У Мінску ў паветры адчуваецца моцны пах гару, а неба зацягнула смугой, пры гэтым у МНС запэўніваюць, што ў горадзе ўсё спакойна, піша «Смартпрэс».
Паводле звестак выдання, у прэс-службе Мінскага аддзялення МНС паведамілі, што ніякіх пажараў ці іншых надзвычайных здарэнняў у сталіцы не адбываецца.
«Пах і дым могуць быць звязаныя з пажаранебяспечнымі ўмовамі надвор’я ў лясах і на балотах краіны. Гэта можа быць і інверсія пасля патушаных лясных пажараў, калі цёплыя масы паветра не падымаюцца ў верхнія пласты паветра, а застаюцца ўнізе і ветрам разносяцца па тэрыторыі», — так патлумачыла сітуацыю прэс-сакратар сталічнага аддзялення МНС Вольга Мельчанка.
Раніцай 11 верасня Мінлясгас у сваім тэлеграм-канале паведамляў, што ўсю ноч дзяржлесахова тушыла буйны пажар у Крупскім раёне Мінскай вобласці. Там гараць лес і балота. Са стыхіяй змагаецца больш за 150 работнікаў лясгасаў.
Нагадаем, сіноптыкі абвясцілі на 11−12 верасня чырвоны ўзровень небяспекі ў трох абласцях (Гомельскай, Магілёўскай і Брэсцкай) праз надзвычайную пажарную небяспеку.