«Кіберпартызаны» ўзламалі некалькі сайтаў, звязаных з уладамі Беларусі, а таксама парталы кампаній, якія, паводле сцверджання групы хакераў, займаюцца вытворчасцю і пастаўкамі ваеннай тэхнікі. Пра гэта яны паведамілі ў сваім тэлеграм-канале.
Узламанымі аказаліся сайт эканамічнага суда СНД, партал тэхнапарка Магілёва, анлайн-выданні brest.by і «Навіны Брэста», а таксама старонка санаторыя «Белая Русь», які належыць Міністэрству ўнутраных справаў.
Цяпер частка з гэтых сайтаў ужо выглядае як звычайна, частка з іх не працуе. «Кіберпартызаны» таксама апублікавалі захаваныя версіі парталаў — за час, калі яны яшчэ былі ўзламаныя.
Узлом, як паведамляецца, прымеркаваны да Новага года. Такім чынам «Кіберпартызаны» хацелі стварыць «правільную атмасферу з навагоднім кібердызайнам і сапраўднай беларускай музыкай, якая аднойчы зноў будзе гучаць па ўсёй свабоднай Беларусі».
Асобна «Кіберпартызаны» адзначылі ўзлом сайтаў кампаній, якія займаюцца вытворчасцю і пастаўкай ваеннай тэхнікі. Гаворка ідзе пра парталы «Ваенсэрвісу» (гандлёва-вытворчае прадпрыемства пры Міністэрстве абароны) і «Інсаера». Апошняя трапіла пад прыцэл «Кіберпартызанаў» праз тое, што Мінабароны — яе кліент: на сайце кампаніі пазначана, што яна займаецца «CRM-сістэмамі, віджэтамі, сістэмамі камунікацыі з кліентамі, падключэннем аплатных сістэм».
— Беспакарана гэта не пройдзе. Мы ўжо ўнутры вашых сістэм і ведаем кожнага з вас. Калі вам не абыякавы лёс і свабода сваёй краіны, сабатуйце выпуск прадукцыі, якая ідзе акупантам, і перадавайце нам доступы, — звярнуліся «Кіберпартызаны» да тых, хто працуе ў названых кампаніях.
Чытайце таксама
