На беларуска-польскай мяжы сабралася рэкордная чарга з легкавікоў. Пра гэта сведчаць звесткі маніторынгу Дзяржпамежкамітэта.
Станам на 00.00 27 кастрычніка выезду ў Еўрасаюз праз пункт пропуску «Брэст» (з польскага боку «Тэрэспаль») чакала 1360 легкавых аўтамабіляў і 50 аўтобусаў. Да 18.00 чарга з легкавікоў вырасла да 1363, а аўтобусаў — да 75.
Некаторыя перавозчыкі ўжо папярэдзілі сваіх кліентаў пра адхіленне ад раскладу. Так, напрыклад, аўтобус Варшава — Мінск (АС 5278−7) адпраўленнем з польскай сталіцы 27 кастрычніка ў 12.00 выехаў у 17.00 праз «працяглае праходжанне дзяржаўных межаў».
Не паводле графіку ішоў і іншы аўтобус Варшава — Мінск. Пасажыры мусілі выехаць са сталіцы Польшчы ў 7.00, але час перанеслі на 14.00. Прычына тая самая.
У чатах па перасячэнні мяжы таксама паведамляюць пра доўгі час чакання.
«Калапс на мяжы», — напісаў адзін з карыстальнікаў.
«А што яшчэ будзе на наступным тыдні, бліжэй да серады, вы нават уявіць не можаце», — адказаў другі.
На іншых участках беларускай мяжы сітуацыя менш напружаная. Выезду ў Літву чакае 70 легкавікоў і два аўтобусы ў «Каменным Логу» і 40 аўтамабіляў — у «Беняконях». У чарзе ў Латвію прастойваюць 40 аўто («Грыгароўшчына»).