Двух чытачоў «Люстэрка», якія маюць статус «не прыдатны ў мірны час», тэрмінова выклікаюць у ваенкамат для пераагляду. Хоць да планавай працэдуры ў аднаго з іх яшчэ больш за год. Разбіраліся, у чым рэч.
«Прыйшло ўказанне звыш»
Віктару 20 гадоў, ён жыве ў невялікім горадзе Віцебскай вобласці. У 2021 годзе хлопец атрымаў ступень НПМ (не прыдатны ў мірны час), але з перааглядам кожныя тры гады. Паводле раскладу пайсці ў ваенкамат ён мусіў восенню 2024-га, але ў войску вырашылі інакш.
— У лютым змянілі спіс хваробаў, якія дазваляюць прызнаваць непрыдатным. І калі ў пачатку траўня мне патэлефанавалі з ваенкамата для ўдакладнення звестак, яны папярэдзілі, што пасля гэтых зменаў я магу лічыцца прыдатным. І спыталі, ці не хачу я прыйсці да іх, бо «чым раней адслужыш, тым лепш», — цытуе Віктар супрацоўнікаў ваенкамата. — Я сказаў, што лепш пачакаю. Раптам яшчэ нешта знойдуць, каб зноў лічыцца непрыдатным. Тады я думаў, што ўсё ў парадку, у мяне ёсць паўтара года, каб знайсці прычыну і не служыць. Але ў сярэдзіне траўня мне зноў патэлефанавалі і сказалі тэрмінова прыйсці. Маўляў, адмовіцца ад датэрміновага пераагляду нельга.
Прычыны такой спешкі Віктару не патлумачылі, спаслаўшыся на загад зверху і змены ў спісе хваробаў. Позвы маладому чалавеку таксама не даслалі. Але хлопец усё ж вырашыў пайсці ў ваенкамат. Позву атрымаў ужо на месцы. І цяпер медыкі будуць вырашаць, прыдатны ён ці не.
— Мне далі накіраванне ў паліклініку, я прайшоў некалькі дактароў. А потым сказалі легчы ў бальніцу, каб пацвердзіць дыягназ, — расказвае ён. — Я не разумею гэтай сістэмы: калі ў мяне быў дыягназ і я ўжо лічыўся непрыдатным, навошта мне цяпер класціся ў бальніцу, калі яны лічаць мяне прыдатным? Заблытана неяк. Прычым у мяне псарыяз, і дактары на медаглядзе нават не ведалі, што са мной рабіць, куды пісаць накіраванне, здаровы я наогул ці не. У ваенкамаце таксама не ведаюць, што рабіць з маім накіраваннем у бальніцу.
— Але я не разумею, чаму нельга дачакацца восені 2024 года. Чаму трэба тэрмінова ўсё гэта рабіць? Мне ніяк не тлумачаць, — абураецца Віктар. — Я наогул у шоку. Спакойна сабе жыў, ні пра што не перажываў. А тут рэзка ўсе планы абрываюцца. Толькі пачалося нармальнае жыццё, знайшоў добрую працу. А цяпер мяне хочуць выдраць з усяго гэтага на паўтара года.
Падобная сітуацыя адбылася з 21-гадовым Андрэем. Малады чалавек жыве ў адным з раённых гарадоў Віцебскай вобласці і гэтак жа, як Віктар, не гарыць вялікім жаданнем служыць.
— Мне патэлефанавалі з ваенкамата і сказалі прыйсці для праходжання медкамісіі. Але я не прыдатны ў мірны час, а пераагляд толькі ўвосень, так напісана ў ваенніку. Я пра гэта сказаў, на што мне адказалі: «Прыйшло ўказанне звыш правесці раней», — расказвае ён. — Сябры і сваякі мне сказалі, што я не абавязаны з’яўляцца па званку, таму нікуды не пайшоў. А на званок з гэтага нумара вырашыў больш не падымаць, ён нават не пазначаны на сайце ваенкамата.
Пасля гэтага Андрэю даслалі позву на месца працы. На медагляд ён пакуль не хадзіў — знаходзіцца на бальнічным. Але іншага выйсця для сябе не бачыць.
— Я не разумею, навошта мяне завуць цяпер. Наўпрост напісана: я не прыдатны ў мірны час. Атрымліваецца, цяпер ужо нямірны? — іранізуе ён. — Да таго ж у ваенкамаце мне сказалі, што мая хвароба не трапіла пад карэктаванне (у Андрэя праблемы з сасудамі, яму складана доўга хадзіць. — Заўв. рэд.), з ёй усё гэтак жа не бяруць. Навошта тады клікаць? Ды і ўсё роўна ёсць асцярога, забяруць у войска ці не. Ці мала што доктар напіша.
Абодва нашыя суразмоўцы расказалі, што ведаюць яшчэ некалькі падобных выпадкаў. Напрыклад, на пераагляд па тэлефоне выклікалі знаёмага Віктара. Малады чалавек з Мінска і таксама не прыдатны ў мірны час. У ваенкамат ён пакуль ісці не збіраецца — чакае позвы. У Андрэя такіх знаёмых няма, але ён кажа, што гісторыі пра тэрміновы медагляд людзей, якія не прыдатныя ў мірны час, ён таксама чуў не раз.
Што кажуць у ваенкамаце?
Чытачка «Люстэрка», хлопца якой гэтак жа тэрмінова выклікалі на пераагляд, патэлефанавала ў ваенны камісарыят Віцебскай вобласці з пытаннем, у чым прычына. Запіс размовы яна перадала ў рэдакцыю.
— Хлопца выклікаюць тэрмінова на пераагляд, хоць наогул ён мусіць ісці толькі ў наступным годзе, бо не прыдатны ў мірны час. Можаце падказаць, чаму такая тэрміновасць?
— Не магу сказаць, чаму такая тэрміновасць. Выклікаюць жа яго не ў абласны камісарыят, а ў гарадскі.
— Проста ў гарадскім нічога толкам не тлумачаць, трэба прыйсці, і ўсё. А што, чаму — ніхто не кажа.
— А вы баіцеся, што ён пойдзе ў войска?
— Ну, не хацелася б. Ён быў не прыдатны, а цяпер, атрымліваецца, можа пайсці служыць восенню. Былі планы. Незразумела наогул, наколькі законна вось так выклікаць.
— Патлумачыць я вам не магу, бо ў мяне няма асабістай справы прызыўніка, нічога. Гэта толькі спецыялісты, якія прызначаюць, [змогуць сказаць]. Але я не думаю, што ўсё гэта неправамерна.
— Проста што выклікаюць амаль на год раней, хоць наогул ён быў не прыдатны ў мірны час. Тэлефануюць і тэрмінова кажуць прыйсці, а потым позву на працу дасылаюць. Незразумела, чаму так раптоўна і менавіта цяпер?
— Не магу падказаць, бо кожны індывідуальна будзе, у мяне такіх звестак няма.
— То-бок гэта ўсё ў індывідуальным парадку вырашаецца, пераглядаюць справу чалавека і выклікаюць?
— Цалкам магчыма. Працуе камісія дактароў, і яны, магчыма, праводзяць даабследаванне. Тут я падказаць не магу.
Чытайце таксама
