У мінулую суботу Аляксандр Лукашэнка наведаў Шклоўскі раён і сустрэўся там з мясцовымі жыхарамі. Адна з іх папрасіла Лукашэнку балатавацца на новы тэрмін і змяніць Канстытуцыю так, каб «пажыццёва прэзідэнт балатаваўся». «Люстэрка» даведалася, хто гэтая жанчына.
— Я хачу вам пажадаць, галоўнае, здароўя адразу. І каб вы балатаваліся на наступны год прэзідэнтам абавязкова, — сказала бландзінка з кійком. — І яшчэ адна просьба: каб трошкі змянілі ў Канстытуцыі, каб пажыццёва прэзідэнт у нас балатаваўся.
Лукашэнка не адказаў нічога канкрэтнага.
— Я ўжо публічна пачынаю казаць усім вам. Вы павінныя прывыкаць да таго (я вас распесціў трошкі), што прэзідэнт будзе іншы, — сказаў ён. — Не, я не кажу: заўтра я вас кіну, паслязаўтра і іншае… Ну, усякае ж у жыцці бывае. Вы павінныя прывыкаць да таго, што я не вечны, як і ўсе.
Жанчына сказала, што сустракаецца з Лукашэнкам ужо трэці раз. Да гэтага яны бачыліся ў 1995 годзе, яшчэ раз — у вёсцы Ліпаўка Касцюковіцкага раёна.
З дапамогай праекта Digital Intelligence Team «Люстэрка» высветліла яе асобу. Жанчыну на відэа завуць Іна Токар, цяпер ёй 67 гадоў.
Мяркуючы з яе адкрытага профіля ў VK, яна цікавіцца ў асноўным кулінарыяй. На яе старонцы часцей за ўсё сустракаюцца перапосты з групаў накшталт «Кухарочка» і «Вкусные рецепты». Таксама яна падпісаная на старонкі спявачкі Валерыі і прадзюсара Віктара Дробыша.
Іна Токар не займае высокіх пасадаў, высветліла «Люстэрка» з дапамогай BELPOL. Цяпер яна пенсіянерка, раней працавала прадавачкай у Шклоўскім райспажыўтаварыстве, да гэтага — заатэхнікам у калгасе «Ленінскі шлях». Жанчына замужам, у яе ёсць дачка. Муж Іны працаваў зваршчыкам у мясцовай арганізацыі ЖКГ, а пазней — рознарабочым у райспажыўтаварыстве — тамсама, дзе і сама жанчына ў мінулым. Дачка Іны — прадавачка ў гэтым жа райспажыўтаварыстве, зяць — ахоўнік у краме.
Нагадаем, Лукашэнка не менш за пяць разоў абяцаў сысці і не менш за сем — не трымацца за ўладу «пасінелымі пальцамі». Аналітык Аляксандр Класкоўскі адзначаў, што пасля пратэстаў 2020-года палітык здолеў пераканаць сябе, што заклікі сысці былі ад «няправільных» прадстаўнікоў народа. Таму свае развагі ў духу «калі скажаце — усё» адрасаваныя не ўсім грамадзянам, а толькі лаяльным рэжыму.
Чытайце таксама
